“Oliy ta’lim, Fan va ishlab chiqarish tizimida xalqaro hamkorliklar tizimini rivojlantirish” mavzusidagi onlayn uchrashuv

25.12.2020

2020 yil 24 dekabr kuni Toshkent kimyo-texnologiya institutida “Vinochilik texnologiyasi va sanoat uzumchiligi” fakulteti tashabbusi bilan O‘zbekiston, Daniya, Hindiston, Rossiya federatsiyasi, Belarus va Qozog‘iston respublikasining oliy ta’lim muassasalari hamda O‘zR FA Mikrobiologiya ilmiy tadqiqot instituti hamkorligidagi ““Oliy ta’lim, Fan va ishlab chiqarish tizimida xalqaro hamkorliklar tizimini rivojlantirish” mavzusidagi onlayn-uchrashuvi bo‘lib o‘tdi.

Mazkur uchrashuvda Kopengagen Universiteti (Daniya), Integral Universiteti (Hindiston), Auezov nomidagi Janubiy Qozog‘iston Universiteti (Qozog‘iston Respublikasi), K.G.Razumovskiy nomidagi Moskva texnologiyalar va boshqaruv davlat universiteti (Rossiya), Tambov Davlat texnika universiteti (Rossiya), Mogilyov oziq ovqat davlat universiteti (Belarus), Toshkent kimyo-texnologiya instituti, (O‘zbekiston), Termiz Davlat Universiteti, Guliston Davlat Universiteti hamda O‘zbekiston Respublikasi Fanlar akademiyasi, Mikrobiologiya instituti olimlari ishtirok etdi.

 
 

Uchrashuv doirasida akademik harakatchanlik, o‘zaro tajriba almashish va ilmiy hamkorliklar tizimida Oliy ta’lim va ilmiy tadqiqot muassasalariaro xalqaro aloqalarni yo‘lga qo‘yish va uning strategiyasi belgilab olindi. Jumladan,

  • bakalavrlar, magistrlar va professor-o‘qituvchilar mobilligini yo‘lga qo‘yish (magistrantlarga va aspirantlarga hamkorlikda ilmiy rahbarlik qilish, o‘zaro stajirovkalarni tashkil etish (onlayn, offlayn) va o‘quv dasturlarini yaratish;
  • Hamkorlikda ilmiy tadqiqot ishlarini amalga oshirish (qo‘shma loyihalar tayyorlash, o‘zaro ilmiy laboratoriya imkoniyatlaridan foydalanishni yo‘lga qo‘yish, aspirantlar va doktorantlar stajirovkasini amalga oshirish;

Hamkorlikda ilmiy konferensiya, simpozium va forumlar o‘tkazish.